cuestionándome o "futuro"

Esta semana veño especialmente cabreada co sistema universitario en xeral, e non podo evitar preguntarme (unha vez máis, para variar) que sentido ten pasar tanto tempo estudando...

co caro que sae,

co pouco que aprendo (que me pode aprender - por poñer un exemplo ao azar- un señor que non sabe prender un ordenador nin colocar ben un p... pronome?),

sen saber que vai pasar coa miña carreira para o ano que vén

e estando case segura de que non vou atopar traballo...

En fin, que non vos enganen, facede ciclos se non queredes acabar mal!

O Teixo

Pois hoxe quérovos falar desta asociación da que ando en proceso de facerme socia...

A verdade é que as actividades que realizan non teñen desperdicio ningún, e pesoume bastante non ir á dos petróglifos pero... aí vén a parte negativa, e é que os domingos pola mañá non é o mellor momento para estas cousas xD Aínda que penso que o esforzo paga a pena...

Botádelle unha ollada: www.oteixo.org

29 de febreiro

Vou actualizar hoxe aínda que teña pouco que contar, que 29 de febreiro hai poucos e hai que aproveitalos (paso de explicar o dos anos bisestos que hoxe cóntano en tódolos lados, pero pobres leapers...)

Aínda que o peor de todo é que temos que aguantar os políticos un día máis antes das eleccións, que mira que son pesados! Hoxe cando cheguei á casa tiña unha morea de propaganda que foi chegando ao longo da semana, que bo lume fai! Si, confésoo, son unha votante indecisa. Só teño claro a quen non votar, pero non sei nin se votarei e se o fago igual o boto a sortes... Chamádeme pasota se queredes, pero eu prefiro definirme como realista, porque os de sempre son os de sempre e non van cambiar, e os que podían facer algo... digamos que xa non é que me entusiasmasen antes, e agora téñenme un chisco defraudada.

Así que, ocupareime de ir estudando para os exames que lle hei sacar máis proveito que a darlle voltas ao voto...

letra de médico

Velaquí unha mostra dun típico tópico que se cumpre sistematicamente:

Neste mundo no que as ciencias e as letras son irreconciliables (deus nos libre aos de letras de ter curiosidades científicas e viceversa), é comprensible que un médico se vaia esquecendo de escribir, do mesmo xeito que eu fun esquecendo a táboa de multiplicar. Non a sei, e tampouco me fai aló moita falta que para algo están as calculadoras...

Se eu uso a calculadora para as operacións máis triviais, un médico non podería usar o ordenador para que os seus pacientes puidesen entender o que lles pasa, que é o que se lles receita e como tomalo?

Aí queda a pregunta, e eu quedo coa dúbida de qué teño que tomar, se alguén o descifra ou sabe da existencia de tradutores de letra de médico agradeceríalle que mo fixese saber. Aínda que unha infección de gorxa é o de menos, hai cousas peores...

de volta

Aínda que vos pareza mentira... aquí estou de novo! Pensei en pechar o blog pero deume pena. Xa é moito tempo latricando nel, e collinlle cariño (unha, que é así de sentimental).

Non me vou poñer moi transcendental que quero que cheguedes polo menos á metade do post... Contareivos que me dediquei basicamente a estudar desde a última actualización (aínda que iso xa o sabedes case tod@s @s que ides ler isto). Xa me pode servir de algo, que senón non volvo mirar para uns apuntamentos na vida! (vale, igual si, que agora non é plan de deixar a carreira a medias...)

O mellor de todo é ese alivio que se sinte ao rematar (aínda queda algún parcial, pero eses non contan). Aínda así, creo que vou botar de menos a algún que outro profesor, porque xa había ben tempo que non tiña a sensación de que ir a clase me servira para algo...

Pois nada... que espero ter un pouco máis de tempo para todo o mundo (polo menos durante unha tempada), pero non prometo actualizacións periódicas, nin aquí nin no flog, que xa sabedes como son eu para estas cousas... Intentarei dedicarme uns días a facer algo decente da páxina de apuntamentos, pero ándome mergullando en linux e igual non teño tempo para todo... xD

Unha aperta, que ben a merecedes @s que pasedes por aquí despois de tanto tempo...